Bergsteinn Gíslason

Bergsteinn Gíslason, loftskeytamaður

Beggi lofskeytamaður er frekar lágvaxinn og fjörugur náungi. Félagslyndur og skemmtilegur.

Hann var ávalt tilbúinn til gleðskapar hverju nafni sem nefndist.
Mikill bjórunnandi, raunar eins og flestir um borð.

Starf loftskeytamanns var hefðbundið og að mestu bundið við loftskeytaklefann og tilheyrandi búnaði, og frekar lítið um yfirvinnu.

Hann reyndi því stundum að næla sér í yfirvinnu á hásetakaupi, með því að semja við stýrimann og bátsmann, vegna málningarvinnu og fleiru sem oft þurfti að ljúka á sem skemmstum tíma.

Eitt sinn er hásetarnir voru niðri á svæði hásetaíbúða við að mála gangana þar. Falaðist hann eftir vinnu hjá þáverandi bátsmanni Ægir Björnssyni.

Ekki taldi Ægir neina þörf á fleirum til verksins sem þar voru við vinnu, og sagði nei, þrátt fyrir ítrekaða beiðni Begga, eins og hann var oft kallaður.

Þegar Ægir hélt að Beggi væri farinn af svæðinu, þá sagði Beggi með breyttri hjáróma röddu:

 "Get ég ekki fengið að mála gólflistana?"  Beggi var frekar lágvaxinn, eins og fyrr er getið. Þetta djók Begga stóðst Ægir ekki og lofaði honum að mála gólflistana upp á klukkutíma akkorð, sem Beggi lauk með bros á vör innan tilsetts tíma.
Þetta er eitt lítið dæmi um fjörkálfinn Begga, sem einnig var oft kallaður Lofti, stytting frá Loftskeytamanni.

Beggi var ávalt fús til þátttöku á leiklistarsviðinu um borð, og þar alls ófeiminn.