Landlegusmellir

Landlegusmellir

Eitt af dægurdvölunum sem stunduð voru yfir sumartímann þegar landlegur voru hjá síldarbátunum var kallað bátastökk. 

Það sport var þó ekki stundað af yngri en 11-12 ára. Þetta var hörð keppni, ekki þó beint um hraða eða á milli okkar heldur því að komast alla leið.  

5-6 guttar tóku sig saman og ákváðu að fara í bátastökk. Hópurinn fór fyrst í könnunarleiðangur sem hófst við Öldubrjótinn og lauk syðst við bakkabryggjurnar í suðurbænum.
Ef aðstæður þóttu heppilegar var lagt í hann. Með í för voru amk tvær bambusstangir með krók á endanum, sem var oftast stór lúðuöngull.  Tilgangurinn var að fara um borð í það síldarskip eða nótabát sem syðst var í firðinum, og fara svo á milli nótabátanna án þess að fara upp á bryggju, alla leið „koll af kolli“ um borð í þann bát sem norðaustast lá við Öldubrjótinn. 

Þetta tókst mörgum sinnum, þó ekki alltaf. Oft var erfitt að krækja og toga í nótabátana til að geta stokkið um borð og fyrir kom að stokkið var í sjóinn fyrir slysni í tilraun til að stökkva í næsta bát. Það þótt ekki eins vænn kostur eins og að komast á þurrum fótum en var þó ekki talið ógild aðferð.