Til Bæjarstjórnar Siglufjarðar

Ágætu ráðamenn Siglufjarðarbæjar !

 Við undirritaðar bornar og barnfæddar á Siglufirði,  ákváðum að senda ykkur línu um efni sem okkur er afar hugleikið og varðar alla, bæði brottflutta Siglfirðinga og þá sem byggja bæinn í nútíð og framtíð.

 Á netinu má sjá síðu Steingríms Kristinssonar þar sem hann hefur í gegnum langa tíð safnað mikilvægum heimildum í formi ljósmynda.  Þar gefur einnig að líta safn það sem Kristfinnur ljósmyndari Siglufjarðar  átti.  Þetta eru gersemar sem sýna mikilvægar heimildir um Siglfirðinga fyrr og nú.  Þessar gersemar mega ekki glatast og eru í raun einstakar.  Það eru sennilega ekki mörg bæjarfélög sem geta státað af slíku heildarsafni.

 Það er hverjum manni nauðsynlegt að vita úr hvaða jarðvegi hann er sprottinn. Ljósmyndasafn sem hefur að geyma myndræna fortíð og nútíð þess merka fólks sem hefur byggt bæinn gefur ungum sem gömlum gullið tækifæri til að skoða uppruna sinn og rætur.  Okkur leikur forvitni á að vita hvað bæjarfélagið hyggst gera með þetta merkilega safn.

 Við viljum hvetja ykkur, ágætu ráðamenn til að sjá til þess að þetta safn verði varðveitt á sómasamlegan og öruggan hátt í framtíðinni og það verði aðgengilegt til skoðunar bæði í tölvutæku formi og reglulegu sýningarhaldi í hjarta bæjarins. 

 Jafnframt þykir okkur  við hæfi að sá sem hefur sýnt einstakan áhuga og eljusemi að halda þessu safni saman ásamt því að vera  höfundur af allmörgum myndum verði áfram umsjónarmaður slíks safns.

 Ef til vill eru þessi mál þegar í höfn og þið búin að setja þetta verkefni í forgang inn á ykkar fjárhagsáætlun og fögnum við því ef svo er.  Við förum þess á leit við ykkur að þið sendið okkur svör og útskýringar um stöðu mála eins skjótt og unnt er.