Síminn hringdi á SR-Trésmíðaverkstæði. Spurt var eftir Þorleifi.

Þorleifur Sigurðsson og Sigurður Jónsson

  • Grisjun í garði

 "Sæll Þorleifur, Sigurður Jónsson hérna. " "Já sæll og blessaður, hvað get ég gert fyrir þig Sigurður ?"

"Heyrðu mig Leyfi, Gyða er alveg að gera út af við mig, ég var fyrir löngu búinn að lofa henni að hafa samband við þig en alltaf gleymt því og nú verður ekki undan því vikið lengur."

Leifi hlustar á með athygli.

"Það er vegna trjánna sunnan við húsið, eitt tréð er farið að skyggja svo mikið á gluggann svo að illa sést út og svo þegar hvessir þá er það alltaf að berjast í gluggann og ekki svefnfriður.

Mig langar til að biðja þig að koma í fyrramálið með græjur til að höggva tréð, eða grisja greinarnar svo sjáist út og að þær sláist ekki í lengur gluggann. Best væri ef þú gætir komist upp úr klukkan 7, þá verð ég kominn á fætur og skýri málið frekar fyrir þér.

"Ekkert mál Sigurður, ég mæti" svarar Leifi drjúgur á svip eftir að hafa talað við sjálfan forstjóra Síldarverksmiðja ríkisins. það sáu félagar hans á tréverkstæðinu sem fylgst höfðu með og spurðu hvort eitthvað merkilegt væri á seiði.

Leifi lýsti hróðugur með nokkrum orðum, til félaga sinna á Tréverkstæði SR, hvað umræðuefnið hefði verið, við sjálfan forstjórann.

Svo var það klukkan 7 á mínútunni sem Leifi mætir á Lagerinn til Eggerts og biður um að fá lánaða stóra öxi sem hann vissi að þar væri þar til og léttan stiga og svo að fá Snorra Dalmann til að keyra sig heim til Sigurðar Jónssonar.

Eggert spurðu sakleysislega hvað stæði til og fékk greið svör. Leyfi yfirgaf svo lagerinn vopnaður stórviðarsög og öxinni góðu ásamt Snorra sem hélt á stiganum.

Snorri stöðvaði Chevrolet vörubifreiðina sem hann hafði til umráða á Lagernum , við hús Sigurðar við Hlíðarveg, hann tók stigann og bar inn á lóðina og beið átekta. Leifi vatt sér að aðaldyrunum vopnaður öxi og stórviðarsög og bankaði. Nokkur bið var svo hann bankaði aftur og nú harðar en áður.

Til dyra kom Sigurður Jónasson greinilega nývaknaður og spurði hálf önugur um hvað væri í gangi, en hann virti Leifa vandlega fyrir sér.

Leifi svaraði um hæl. "Þú sagðist mundi vera kominn á fætur. Hvar á ég að byrja ?"

Sigurður horfir á Leifa um stund og síðan á Snorra með stigann og spurði svo "Hvað áttu við?"

"Þú hringdir í gær og baðst mig að grisja trén sunnan við húsið" Svaraði Leifi og var nú eitthvað farinn að efast um málavöxtu.

Þá fór Sigurður að hlæja góðlátlega og sagði við Leifa

"Nú hefur Eggert verið að stríða þér."

Nei, nei, það varst þú sem hringdir, eða var það ekki ? Endaði hann setninguna vandræðalegur og hálf sneyptur á svip. Nei það hefur verið Eggert, eða Frissi bætti Sigurður við.

Leifi fór sneyptur út af lóðinni og hefur örugglega hugsað Eggerti gott til glóðarinnar á leiðinni. Ekki fór orð á milli þeirra félaga Snorra og Leifa á leiðinni til baka.

Og þegar niður á lóð var komið, þá rauk hann út úr bílnum með stórviðarsögina og lét ekki sjá sig á Lagernu næstu daga. Snorri varð svo margsinnis að endurtaka söguna eftir að Frissi og Eggert höfðu fengið að heyra hana, við hina og þessa á SR lóðinni, meðal annars mig.

En það var Eggert Theodórsson, með aðstoð Friðriks Friðrikssonar (Frissa) sem talað hafði við Leifa og þóst vera Sigurður, og voru frumkvöðlar þessa hrekks.

Steingrímur, ég einn af þeim sem var á tréverkstæðinu er síminn hringdi

Ljósmyndir: Steingrímur. © Ljósmyndasafn Siglufjarðar