Kolbrún Pálsdóttir

Kolbrún Pálsdóttir - ókunnur ljósmyndari

Mbl.is  12. október 2011 | Minningargreinar

Kolbrún Pálsdóttir (Hjaltason) fæddist á Siglufirði 10. apríl 1932. Hún lézt á sjúkrahúsi í Campbelltown, NSW, Ástralíu, 1. apríl 2011.

Móðir Kolbrúnar var Guðrún Sveinsdóttir f. 18.12. 1907, d. 18.9. 1964.

Dætur Guðrúnar:

  • Ríkarð Jón Ásgeirsson, f. 18. febrúar 1926, d. 17. febrúar 2007,
  • Brynja Gestsdóttir, f. 17. nóvember 1927, búsett í Reykjavík, og
  • Kolbrún Pálsdóttir, f. 10. apríl 1932, d. 1. apríl 2011.

Eftirlifandi eiginmaður Kolbrúnar er Einar Hjaltason f. 13.12. 1928.
Börn Kolbrúnar og Einars eru:

  • 1) Guðrún Einarsdóttir (Zeidler) f. 30.7. 1952. Hennar maður er Peter Zeidler f. 1935,
  • Sonur Guðrúnar af fyrra sambandi er
    • Reynir Þór Sævarsson f.9.8. 1970.
  • 2) Friðrik Einarsson (Hjaltason) f. 4.9. 1955.
    Hann á tvö börn,
    • Sóley f. 13.12. 1978 og
    • Shane Einar f. 25.3. 1977.
  • 3) Birna Einarsdóttir (Williams) f. 9.10. 1962, Maður hennar er Rex Williams f. 1953. Þau eru barnlaus
  • 4) Bryndís Einarsdóttir (Franklín) f. 6.9. 1959. Maður hennar er Luke Franklín f. 1957.
    Börn þeirra eru 
    • Jay Liam f. 5.9. 1978,
    • Beau, f. 20.8. 1980,
    • Renee, f. 11.6. 1983,
    • Kaine, f. 9.6. 1989.

 

  • 5) Ingibjörg Einarsdóttir (Fee) f. 19.7. 1965. Maður hennar er Mark Fee, f. í mars 1965.
  • Börn þeirra eru
    • Joshua, f. 1.3. 1997,
    • Benjamin, f. 11.3. 1998.

  • 6) Hjalti Einarsson (Hjaltason), f. 24.7. 1967. Hans kona er Linda Hjaltason, f. 1969.
    Börn þeirra eru
    • Bryce, f. 23.10. 1995,
    • Alexander, f. 23.12. 1998.
    • Kolbrún eignaðist dóttur fyrir hjónaband,
    • Sigríði Knudsen, f. 23.5. 1949. Sambýlismaður hennar er Einar Trúmann Einarsson.

 

Kolla ólst upp með systkinum sínum hjá fósturforeldrum móður sinnar á Siglufirði, Friðrikku Þorsteinsdóttur og Jóni Jónassyni, sem þau kölluðu ömmu og afa. Guðrúnu Sveinsdóttur, Hallgrímssonar frá Skeiði í Svarfaðardal, móður þeirra hafði verið komið nokkurra vikna gamalli í fóstur til þeirra í Haganesvík í Fljótum. Kolla og Einar bjuggu í Keflavík til 1969. Eftir það í Ástralíu.

Kolbrún móðursystir mín lézt 1. apríl sl. í Ástralíu. Dánarmein hennar hennar var krabbamein. Við ræddumst oft við í síma, síðast daginn áður en hún dó. Æðruleysi hennar og glaðværð var óbugað. Þau Einar bjuggu ung með sex börn sín í litlu húsi á Bergi í Keflavík. Þar var alltaf nóg pláss fyrir gesti að norðan.

Þótt Kolla byggi við kröpp kjör var hún gjafmild og rausnarleg. En væru gjafir hennar góðar var hún sjálf bezta gjöfin. Hún var falleg, skemmtileg, hláturmild og gáfuð, jafnt til munns og handa. Sennilega var hún líkust móður sinni, Guðrúnu Sveinsdóttur frá Siglufirði, af börnum hennar. Báðar höfðu mikla frásagnargáfu og gátu verið drepfyndnar.

Kolla var eins og amma dökk á brún og brá og fegurðin framandleg. Hún bar nafn með rentu. Samtímis var hún ljós sem alla gladdi. Allir leituðu til hennar. Hún var uppáhald. Fyrir fimmtán árum gerðist ég læknir aldraðra sómahjóna, Guðrúnar og Vals Skowronsky's, en einmitt hjá þeim hafði Kolla unnið á Keflavíkurflugvelli: „Kolla er fallegasta og bezta stúlka sem nokkru sinni vann hjá okkur.“

Haustið 1969 fluttu Kolla og Einar með ung börn sín til Ástralíu, en þá gengu miklar þrengingar yfir Ísland í kjölfar síldarhrunsins. Þar hafa þau átt heima síðan, börn þeirra og barnabörn. Kolla var sterk sem eik og hélt stórri fjölskyldunni saman í gleði og sorg. Allt í senn móðir og vinur. Hún var landi okkar til mikils sóma.

Brynja móðir mín og Lína móðursystir kveðja yndislega systur sína og þakka fyrir allt. Gunnar bróðir átti athvarf hjá Kollu í Keflavík þegar hann fjögurra ára gamall var sendur í Málleysingjaskólann í Reykjavík. Það var dýrmætt. Við ættingjar hér heima sendum Einari eftirlifandi eiginmanni Kollu, Siddý dóttur hennar í Reykjavík, og frændsystkinum okkar í Ástralíu innilegar samúðarkveðjur. Guð blessi minningu Kollu frænku.

Jóhann Tómasson.

Sigurlína Sigurgeirsdóttir og Kolbrún Pálsdóttir (hálfsystur)